Von Veronika Zangerl:

Was isch dejs”Psychobiografisch” pflega?

Zearscht miassa miar an umfongreicha Bouga ausfilla; Ins Leajba vu insara Leit intaucha, dass miar sie sou nejhma wia sie sei und so pflejga wia sie´s braucha. Miar wella insari “Klienta” wia dejs nuimoudische Woart iatz haßt, nit ummoudla, sie dearfa bleiba aia sie sei und mir tia sa mit Lejbasgschichtla wieder aufrichta.

Sie wascha sich salber ob, lejga sich on; knepfla d´Weschta zua und schliafa in Potscha. Sie varsuacha Schrittla z´mocha, wenn ou manchsmol d´Knocha krocha.Sie derfa schtreita und schimpfa, reara und locha, wenn sie mejga baschtla und bocha,  manchsmol sogor a Kortnarli mocha.

D´Leit dia numma guat denka kenna weara miar bsunders earnscht nejma, Dabei komm ruhig amol an Durchanonder aussa kejma. Drei viar Gwander ibaranond on,da rechta Schuahch am linka Fuaß dron. Tabletta gach im Schurzsock varschwinda, s´Zuig varstecka, dass miar`s numma finda. Zänd miassa miar ausm Bluamatopf houhla und Olls wos in Mullkiebl keahrt, tuat ausm Nochtkaschtli troula. Solz im Kaffee, Zucker im Goullasch drin, do frogt ma sich wos hot dejs fir an Sinn.

Da Willa vom “Dementa” Mensch akzeptiara, miar wella nit insar “Prinzip” durchfiehra.

Manchsmol tuat ins an Zuaschpruch guat, mit zommhocka und rejda bringa mar wiedar Olls untar an Huat.

Insar Roswitha mocht dejs mit kluag ausdenktem Pfiff und kriagt dejs gonz schnell in Griff.

Insari Leit tia mir heint varschprecha, dass miar dia Pflejg nia miah obbrecha. Dia Tofla tuat ins motiviara, dia Pflegequalität weiter z´garantiera.